Ab ghar ki deewaron pe ghadi mushkil se dikhti hai.
Bechari ‘endangered’ ho gayi hai.
Mere ghar mein do hain abhi bhi.
Jab ek ghadi ka cell weak hone lagta hai,
ghadi sahi samay se dheere dheere piche hone lagti hai.
Ant mein woh poori tarah ruk jaati hai.
Kabhi kabhi lagta hai, main bhi uss ghadi ki tarah thoda atak sa jaata hoon.
Woh karte hue jo main asal mein karna hi nahi chahta hoon.
Jaise, scroll kar raha hoon.
Pata nahi kya dhoondh raha hoon,
par yeh bhi pata hai ki kuch bhi vishesh nahi.
Yeh scroll khatam nahi hoga, toh main ‘un-atak’ kaise paunga?
Kitna ironic hai ki ‘scroll’ karte hue ‘atak’ sa jaata hoon.
Kaafi baar action nahi leta hoon aur sochta hoon ki koi chamatkar hoga aur main ‘un-atak’ jaunga.
Main khud bhi jaanta hoon ki woh din kabhi nahi aayega.
Main ghadi ke kaante ki tarah aage badh hi nahi paa raha hoon.
Action lena anivarya hai, nahi toh iss ‘atakpan’ se kabhi bahar nahi nikal paunga.
Albert Camus ki kitaab “The Stranger” mein ek line hai,
“that in the long run, one gets used to anything.”
Main iss baat se bilkul sehmat hoon.
Aur isi cheez se darr lagta hai. Koi bhi hamesha ke liye atka nahi rehna chahta, kuch aisa karte hue jo woh asal mein karna hi nahi chahta.